ദുഷ്ടൻ!

             
 "ഓൾ ഐ വാണ സേ ഈസ്‌ ദാറ്റ്
 ദേ ഡോണ്ട് റിയലി കെയർ അബൗട്ട് അസ്‌!"

പതിവില്ലാതെ ഉറക്കമുണർത്തിയതു മൈക്കിൾ ജാക്സണ്‍.

മരിച്ചു വർഷമിത്രയായിട്ടും ഈ മനുഷ്യന്റെ ശല്യം തീർന്നില്ലല്ലോ ദൈവമേ എന്നു പ്രാകിക്കൊണ്ടാണ് എഴുന്നേറ്റത്.

"അതിന്റെ ഒച്ച ഒന്നു കുറച്ചു വെക്കടാ കോപ്പേ !!"

"അയ്യോ സോറി അളിയാ! നിന്റെ ഉറക്കം പോയോ?"

നിങ്ങൾ അവസാനം കേട്ട ആ ശബ്ദത്തിന്റെ ഉടമ എന്റെ റൂംമേറ്റ്‌ ആണ്. പേര് ഫ്രാങ്കോ. അലവലാതിയാണ്. പോരാത്തതിനു ഫ്രീക്കനും. പക്ഷേ നിർഭാഗ്യവശാൽ, പെണ്ണുങ്ങളെ മയക്കാൻ വേണ്ട ഗ്ലാമർ, പാട്ട്, ചിത്രംവര തുടങ്ങിയ ഉടായിപ്പുകളൊക്കെ കയ്യിലുണ്ട്.

പക്ഷേ ജീവിതത്തിലിന്നു വരെ സൂര്യോദയം കണ്ടിട്ടില്ലാത്ത ഇവൻ ഇൗ കൊച്ചുവെളുപ്പാൻകാലത്ത് കുളിച്ചു റെഡിയായി നിൽക്കുന്നതെന്തിനാണാവോ?

"അളിയാ, കോടമ്പാക്കത്തുള്ള ഒരു സ്വർണ്ണക്കടക്കാരൻ ഞങ്ങടെ ആൽബം സ്പോണ്‍സർ ചെയ്യാമെന്നു സമ്മതിച്ചിട്ടുണ്ട്. അങ്ങേരെ എട്ടു മണിക്കു പോയി കാണണം."

അപ്പൊ അതാണു കാര്യം. ഇവനും മറ്റു കുറേ അലവലാതികളും ചേർന്ന് 'ഔട്ട്‌സ്പോക്കൻ' എന്നൊരു ബാൻഡ് നടത്തുന്നുണ്ട്. അവരുടെ മ്യൂസിക്‌ ആൽബത്തിന്റെ കാര്യമാണ് ഇപ്പൊ പറഞ്ഞത്.

"ആള് പൂത്ത കാശുകാരനാ.. പക്ഷേ മ്യൂസിക്കിനെ പറ്റി വല്യ വിവരോന്നുമില്ല."

"അതു മനസ്സിലായി. അല്ലെങ്കി അയാള് സമ്മതിക്കില്ലല്ലോ."

"ഊതല്ലേ മോനേ.. ഈ ആൽബം ഒന്നിറങ്ങിക്കോട്ടെ! പിന്നെ ഫ്രാങ്കോയെ പിടിച്ചാ കിട്ടില്ല!"

"ഉവ്വുവ്വേ.."

അവൻ പോയതിനു ശേഷം, ഞാൻ പാതി കണ്ടു നിർത്തിയ സ്വപ്നത്തിന്റെ  ബാക്കി കാണാനുള്ള ശ്രമം തുടങ്ങി. ചെന്നൈയിൽ വന്നതിൽപ്പിന്നെ എന്റെ പുലർകാല സ്വപ്നങ്ങളെല്ലാം പുട്ട്-കടല, ഇടിയപ്പം-മുട്ട റോസ്റ്റ്‌, അപ്പം-സ്റ്റൂ തുടങ്ങിയ കോമ്പിനേഷനുകളെ ചുറ്റിപ്പറ്റിയാണ്. പക്ഷേ അവയെല്ലാം മെസ്സിലെ കഷ്ണങ്ങളില്ലാത്ത സാമ്പാറിൽ മുങ്ങി അകാലചരമം പ്രാപിക്കാറാണ് പതിവ്.

അന്നും അങ്ങനെ തന്നെ സംഭവിച്ചു.

സൂര്യഭഗവാനും,പതിവു പോലെ പടിഞ്ഞാറോട്ട് തന്നെ ഓടി.

ജോലി കഴിഞ്ഞ്, ബസിൽ തിക്കിത്തിരക്കി, വിയർത്തുകുളിച്ചു റൂമിൽ എത്തിയപ്പോഴേക്കും സമയം എട്ടു മണി.

ഫ്രാങ്കോ കട്ടിലിൽ കമിഴ്ന്നു കിടന്നു പൊരിഞ്ഞ ചാറ്റിംഗ് ആണ്. ഏതെങ്കിലും പുതിയ പെണ്ണിനെ കിട്ടിക്കാണും.

"ആരാഡേ പുതിയ കക്ഷി?"

"ഇന്ന് കോടമ്പാക്കത്ത് വച്ചു പരിചയപ്പെട്ടതാ...  ഷീ ഈസ്‌ സോ ഹോട്ട് മാൻ!"

വൃത്തികെട്ടവൻ!

കുറച്ചു കാലം മുമ്പ് അവൻ ഒരു പെണ്ണിനോട് ചെയ്ത വാട്സപ്പ് ചാറ്റ് അബദ്ധവശാൽ കാണാനിടയായി. അന്ന് അന്തംവിട്ടു പുറത്തോട്ടു തള്ളിയ കണ്ണുകൾ പൂർവ്വസ്ഥിതിയിലാവാൻ ദിവസങ്ങളെടുത്തു.

ആ, അതിനും വേണം ഒരു യോഗം!

ഞാൻ ബക്കറ്റുമെടുത്ത് കുളിമുറിയിലേക്ക് നടന്നു. കണ്ണാടി നോക്കി മുഖത്തെ പഴുത്ത കുരുക്കൾ ഞെക്കിപ്പൊട്ടിച്ചു ഫ്രാങ്കോയോടുള്ള അരിശം തീർത്തു.

കുളി കഴിഞ്ഞു മെസ്സിലേക്കു പോകും വഴി ആരോടോ ഫോണിൽ സംസാരിച്ചുകൊണ്ടിരുന്ന ക്ലീനർ ശരവണൻ കൈകാട്ടി ചിരിച്ചു. തിരിച്ചു ഞാനും. സ്നേഹമുള്ളവനാണ്. ഫോണ്‍ ഒരു കൈ കൊണ്ട് പൊത്തിപ്പിടിച്ച് 'ഗേൾഫ്രണ്ട് സാർ ' എന്നു നാണം കലർന്ന ചിരിയോടെ എന്നോടു മൊഴിഞ്ഞിട്ട്‌ അവൻ സംസാരം തുടർന്നു .

എന്റെ ശിവനേ!!!

ആഴ്ച്ചയിൽ ഒരിക്കൽ മാത്രം കുളിക്കുന്ന ഇവനു പോലും പെണ്ണു കിട്ടി!!!

മെസ്സിൽ പതിവായി എന്റെ ഭക്ഷണത്തിന്റെ പങ്കു പറ്റാൻ എത്താറുള്ള കുറിഞ്ഞിപ്പൂച്ച അവളുടെ പുതിയ കണവനൊപ്പം വന്ന്, ഇഡ്ഡലി കഴിച്ചുകൊണ്ടിരുന്ന  എന്നെ പുച്ഛത്തോടെ നോക്കിയിട്ട് കടന്നു പോയി.

പുറത്തു പൂർണ്ണചന്ദ്രൻ രാത്രിയോട്‌ കിന്നരിച്ചുകൊണ്ടിരിക്കുന്നു.

ഈശ്വരാ!ഇതെന്തു പരീക്ഷണം?

പ്രകൃതി പോലും പ്രണയ പരവശയായിരിക്കുന്ന ഈ രാത്രിയിൽ, ഞാൻ മാത്രം!!!

മെസ്സിൽ നിന്നു തിരിച്ചുവന്നത് ഒരു ദൃഢനിശ്ചയവുമായാണ്.

ഇന്നു ലക്ഷ്മിയെ പ്രൊപ്പോസ് ചെയ്യണം.

ഓ, പറയാൻ വിട്ടുപോയി. ലക്ഷ്മി എന്റെ ഫ്രണ്ടാണ്. എന്റെ നാട്ടുകാരി തന്നെ. ഒരു ട്രെയിൻ യാത്രയിലാണ് അവളെ പരിചയപ്പെടുന്നത്.
ശാലീനസുന്ദരി. ആദ്യം കണ്ടപ്പൊത്തന്നെ അവളോട് ഇഷ്ടം തോന്നിയതാണ്. പറയാനൊരു പേടി. 

പക്ഷേ ഇന്ന് രണ്ടിലൊന്നറിഞ്ഞിട്ടു തന്നെ കാര്യം.

സത്യത്തിൽ ഞാൻ എന്തിനാണു പേടിക്കുന്നത്? ഒരു പെണ്‍കുട്ടിയോട് ഇഷ്ടം തോന്നുന്നത് തെറ്റാണോ?
അല്ലെങ്കിലും എനിക്കെന്താ ഒരു കുറവ്?
സ്വയം പുകഴ്ത്തുകയാണെന്ന് വിചാരിക്കരുത്.
നല്ല കുടുംബം, തരക്കേടില്ലാത്ത ജോലി. കള്ളുകുടി, ബീഡിവലി അങ്ങനെ ഒരു ദുശ്ശീലവുമില്ല.
ഇന്നത്തെ കാലത്ത് ഇങ്ങനെയൊരു പയ്യനെ എവിടുന്നു കിട്ടും?



ഫ്രാങ്കോയുടെ ചാറ്റിംഗ് അനുസ്യൂതം തുടരുകയാണ്.
ശവം!
കാലു മടക്കി അവന്റെ ഊരയ്ക്കൊന്നു കൊടുക്കാനാണ് തോന്നുന്നത്. വേണ്ട. ഒരു നല്ല കാര്യം ചെയ്യാൻ പോകുമ്പോൾ ഇങ്ങനെയൊന്നും ചിന്തിക്കുന്നതു ശരിയല്ല. അവൻ എന്തോ ചെയ്യട്ടെ.

വാട്സപ്പ് തുറന്നു നോക്കിയപ്പോൾ ലക്ഷ്മി ഓണ്‍ലൈൻ ആണ്.
നല്ല ലക്ഷണം!

ഗുരുവായൂരപ്പാ,കാത്തോണേ!

"ഹായ്  ലക്ഷ്മി!"

"ഹായ്"

എങ്ങനെ  തുടങ്ങണമെന്നറിയില്ല.വല്ലാത്ത സ്റ്റാർട്ടിംഗ് ട്രബ്ൾ!

ഒടുവിൽ കാമദേവനെ മനസ്സിൽ ധ്യാനിച്ച്‌ രണ്ടും കൽപ്പിച്ചു ചോദിച്ചു.

"ഫുഡ്‌ കഴിച്ചോ?"

"ഉം. നീ കഴിച്ചോ?"

"ഞാൻ കഴിച്ചു. കല്ലു പോലത്തെ ഇഡ്ഡലി. അതു കൊണ്ട് മെസ്സിലെ പൂച്ചയെ എറിയാനേ കൊള്ളൂ! LOL".
ഹാസ്യം.
മറുപടിയില്ല. ഏറ്റില്ലെന്നു തോന്നുന്നു.

"നീ എന്താ കഴിച്ചേ?" അടുത്ത ചോദ്യമെറിഞ്ഞു.

"പെറ്റിക്കോട്ട്"

"????"

"അയ്യോ.. സോറി,സോറി.. മെസ്സേജ് മാറിപ്പോയി"

പാവം.

തൊട്ടടുത്ത ബെഡ്ഡിൽ, ചെന്നൈയിലെ  നാൽപ്പതു ഡിഗ്രി ചൂടിലും ഫ്രാങ്കോ പുതപ്പിനടിയിലേക്കു വലിഞ്ഞു.

പെട്ടെന്ന്, പ്രണയമഴ  നനഞ്ഞു കുതിർന്നു കിടന്നിരുന്ന എന്റെ  ഹൃദയത്തിൽ യാതൊരു കാരണവുമില്ലാതെ സംശയത്തിന്റെ ഒരു അസുരവിത്ത്‌ പൊട്ടിമുളച്ചു.
സത്യമാവാൻ ഒരു സാധ്യതയുമില്ല.. എന്നാലും...

പുതപ്പിനടിയിൽ തിരിഞ്ഞുമറിയുന്ന സഹമുറിയനോട് ചോദിച്ചു:

"അളിയാ നീ ആരോടാ ചാറ്റുന്നതെന്നു  പറഞ്ഞേ?"

"ഞാൻ പറഞ്ഞില്ലേ??ഇന്നു കോടമ്പാക്കത്ത് വച്ചു കണ്ടതാ.
ആ, നിന്റെ നാട്ടുകാരിയാ. പേര് ലക്ഷ്മി."

ദുഷ്ടൻ!