യക്ഷി

കുറേ നാളുകളായി ഞാൻ ആലോചിക്കുന്നതു മുഴുവൻ യക്ഷികളെപ്പറ്റിയാണ്‌.

അഴിച്ചിട്ട മുടിയും,മുറുക്കിച്ചുവന്ന ചുണ്ടുകളുമുള്ള ഒരു രൂപം തൊട്ടുപിന്നിൽ നിൽക്കുന്നതും, വെളുത്തു നീണ്ട തേറ്റപ്പല്ലുകൾ കഴുത്തിലാഴ്ത്തി ചോര കുടിക്കുന്നതും ഇന്നലെയും സ്വപ്നം കണ്ടു.
ഒറ്റക്കിരിക്കുമ്പോൾ പലപ്പോഴും ഉൾക്കിടിലമുണ്ടാക്കുന്ന ഒരു ചിരി കേൾക്കാറുണ്ട്. ചിലപ്പോൾ പാലപ്പൂവിന്റെ  മണവും വരും.

എല്ലാം എന്റെ തോന്നലാണെന്നാണ് ആൻസി പറയുന്നത്.

"ഈ അച്ചായനിതെന്നാ? നമ്മളു ക്രിസ്ത്യാനികൾക്ക് യക്ഷീം,പ്രേതോമൊന്നും ഇല്ല. ഇനി ഒണ്ടേത്തന്നെ കഴുത്തേക്കെടക്കുന്ന കൊന്ത കാണിച്ചാ മതി. ഓടിപ്പൊക്കോളും!"

അവൾക്കു തമാശ!

എല്ലാം തോന്നലാണെന്നു തന്നെയാണ് ആശ്വസിച്ചിരുന്നത്.
പക്ഷേ ഇന്നലെ രാത്രി വീടിനു മുന്നിൽ കണ്ടത് ഒരു സാധാരണ സ്ത്രീയെയല്ലെന്ന് ഉറപ്പാണ്. വെളിച്ചം കുറവായതുകൊണ്ട് മുഖം ശരിക്കു കണ്ടില്ല. അഴിച്ചിട്ട മുടിയുമായി ഒഴുകിനീങ്ങുന്നതു പോലെയാണ്‌ അവൾ നടന്നിരുന്നത്‌. അടുത്തു വന്നപ്പോൾ പാലപ്പൂവിന്റെ മണം കിട്ടിയെന്നത് തീർച്ച.

യക്ഷികൾ പൊതുവേ പാലകളിലും,പനകളിലുമാണ് താമസം എന്നാണ് കൂടെ ജോലി ചെയ്യുന്ന സുധാകരൻ പറഞ്ഞത്. അവന് അൽപസ്വൽപം ജ്യോതിഷവും കൈനോട്ടവുമൊക്കെ വശമുണ്ട്. ഒരു ചെടി പോലുമില്ലാത്ത ഈ കോണ്ക്രീറ്റ് കാട്ടിൽ ഒരു യക്ഷി വരാൻ സാധ്യതയില്ലെന്നാണ് അവന്റെ അഭിപ്രായം. എന്നാലും പരിചയത്തിലുള്ള ഒരു മന്ത്രവാദിയെക്കൊണ്ട് ഒരു ചരടു ജപിപ്പിച്ചു കൊണ്ടുവരാമെന്ന് ഏറ്റിട്ടുണ്ട്.




ഷെയർ ഓട്ടോയിൽ ഇപ്പോൾ അടുത്തിരിക്കുന്ന പെണ്‍കുട്ടിക്കും അഴിച്ചിട്ട നീളൻ മുടിയാണ്. വെറുതെയൊന്നു മണം പിടിച്ചു നോക്കി. അവൾക്കു തലയിൽ ചൂടിയ വാടിത്തുടങ്ങിയ മുല്ലപ്പൂവിന്റെയും,വിയർപ്പിന്റെയും മണമാണ്.

ആൻസിക്കും നീണ്ട മുടിയാണ്.

കഴിഞ്ഞ ഒരാഴ്ച്ചയായി അവൾക്ക് നൈറ്റ്‌ ഡ്യൂട്ടിയാണ്.രാവിലെ ഞാൻ ജോലിക്കു പോയിക്കഴിഞ്ഞേ തിരിച്ചുവരൂ. ഇപ്പോൾ ആകെ അവളെ കാണാൻ കിട്ടുന്നത് ജോലി കഴിഞ്ഞു വന്നിട്ടുള്ള അര മണിക്കൂറാണ്.

യക്ഷിപ്പേടിയുടെ കാര്യം അവൾ നാട്ടിലൊക്കെ നോട്ടീസടിച്ചിട്ടുണ്ട്. കഴിഞ്ഞ ദിവസം അവളുടെ അപ്പച്ചൻ വിളിച്ചിരുന്നു.

"എന്റെ മോളല്ലാതെ നിന്നെ വേറെ ഏതു യക്ഷി പിടിക്കാനാടാ?"

ആകെ നാണക്കേടായി.




ജംക്ഷനിലിറങ്ങി നടക്കുന്ന വഴിയിൽ വീട്ടിലെത്തുമ്പോൾ കാണുന്ന കാഴ്ച്ചകൾ വെറുതെ സങ്കല്പിച്ചു നോക്കി. ആൻസിയിപ്പോൾ പോകാനുള്ള തിരക്കിലായിരിക്കും. വാതിൽ തുറക്കുമ്പോൾ ചുരിദാറിന്റെ ടോപ്പായിരിക്കും ഇട്ടിട്ടുണ്ടാവുക. നീളൻ മുടി പകുതി കെട്ടി,ചീപ്പ് അതിൽ കുത്തിവച്ചിട്ടുണ്ടാവും. ആശുപത്രിയിൽ ചെല്ലുമ്പോൾ ഇടാനുള്ള വേഷം ബാഗിനകത്താക്കി ടീപ്പോയിൽ വച്ചിട്ടുണ്ടാവും.

അവൾക്കിപ്പോൾ 'ചെറി ബ്ലോസ്സം' പെർഫ്യൂമിന്റെ മണമായിരിക്കും.

വീടിനു മുന്നിലെത്തിയപ്പോൾ കണ്ണുകൾ മുടിയഴിച്ചിട്ട ഒരു സ്ത്രീരൂപത്തിനായി പരതാതിരുന്നില്ല.




കോളിംഗ് ബെല്ലിൽ വിരലമർത്തുന്നതിനു മുൻപേ തന്നെ വാതിൽ തുറന്നു. ചുരിദാറിന്റെ ടോപ്പും, മുടിയിൽ കുത്തിവച്ച ചീപ്പും, ടീപ്പോയിലെ ബാഗുമില്ല. ആൻസി നൈറ്റിയിട്ടു നിൽക്കുന്നു. മുടി ഭംഗിയായി കെട്ടിവച്ചിട്ടുണ്ട്.

"നീയിന്നു പോണില്ലേ??"

"അച്ചായനല്ലേ എന്നെ കാണാൻകിട്ടുന്നില്ലെന്നു പരാതി? അപ്പൊ ഒരു ദിവസം ലീവ് എടുക്കാമെന്നു വച്ചു."

"അതേതായാലും നന്നായി. നീയൊരു കാപ്പിയെടുക്ക്. വല്ലാത്ത ക്ഷീണം."

സോഫയിൽ ചാരിക്കിടന്നപ്പോൾ ആശ്വാസം തോന്നി. വീടെല്ലാം അവളിന്നു വൃത്തിയാക്കിയിട്ടുണ്ട്. സാധനങ്ങളെല്ലാം അടുക്കിവച്ചിരിക്കുന്നു.

സെൽഫോണ്‍ മണിയടിച്ചപ്പോഴേക്കും ഒരു മയക്കത്തിലേക്കു വഴുതിവീണിരുന്നു.

"ഹലോ"

"എത്ര നേരമായിട്ടു വിളിക്കുന്നതാന്നോ? ഫോണിനെന്നാ പറ്റി? ഇത്രേം നേരം അണ്‍റീച്ചബിൾ ആരുന്നല്ലോ? അതേ,ഞാനിന്ന് ഇച്ചിരെ നേരത്തേ എറങ്ങി. ജെസ്സിക്കു കൊച്ചൊണ്ടായിട്ട് ഒന്നു പോയി കണ്ടില്ലല്ലോ.. അതൊന്നു പറയാൻ വിളിച്ചതാ. ഞാനിപ്പൊ ഹോസ്പിറ്റലിലേക്കു ബസ്സു കാത്തു നിയ്ക്കുവാ.. സ്പെയർ താക്കോൽ കയ്യിലുണ്ടല്ലോ അല്ലേ? അയ്യോ ദേ വണ്ടി വന്നു. ഞാൻ എത്തീട്ടു വിളിക്കാട്ടോ.."

ആൻസി!!!!





പറഞ്ഞറിയിക്കാനാവാത്ത ഒരു ഭയം എന്നെ വരിഞ്ഞുമുറുക്കി. ഒരു നിലവിളി പുറത്തുവരാനാവാതെ തൊണ്ടയിൽ കുരുക്കായി കുടുങ്ങി.
യക്ഷികൾ നൈറ്റിയിടുമോ? അവളുടെ കാലുകൾ നിലം തൊടുന്നുണ്ടായിരുന്നോ? പാലപ്പൂവിന്റെ മണം പരക്കുന്നുണ്ടോ? ഒന്നും ചിന്തിക്കാൻ കഴിയുന്നില്ല.
എഴുന്നേൽക്കണമെന്നുണ്ട്. കാലുകൾ മരവിച്ചപോലെ.

"ദേ കാപ്പി.."

പിന്നിൽ നിന്നു വരുന്ന ആ ശബ്ദത്തിന്റെ ഉറവിടത്തിലേക്ക് നോക്കാനുള്ള ധൈര്യമില്ല.

രണ്ടു കൈകൾ പിന്നിൽ നിന്ന് കഴുത്തിനെ ചുറ്റിപ്പിടിച്ചു.

"പേടിച്ചുപോയോ???ഞാൻ ചുമ്മാ ഒന്നു പറ്റിച്ചതല്ലേ?" കഴുത്തിൽ ചുംബിച്ചുകൊണ്ടാണവൾ ചോദിച്ചത്.

മുറുക്കിച്ചുവന്ന ചുണ്ടുകളും,ദംഷ്ട്രകളുമില്ല. ആൻസിയുടെ ചിരിക്കുന്ന മുഖം മാത്രം.

"പേടിത്തൊണ്ടൻ!" അവൾ എന്റെ കവിളിൽ ചുംബിച്ചു.

ചെറി ബ്ലോസ്സത്തിന്റെ മണം!!

ഞാൻ അവളെ വാരിയെടുത്ത് ബെഡ്റൂമിലേക്കു നടന്നു.




അവളെ കെട്ടിപ്പിടിച്ചു കിടക്കുമ്പോഴാണ് വീണ്ടും ആൻസിയുടെ നമ്പറിൽ നിന്നു കോൾ വന്നത്.